લોકડાઉનને કોરોના વાયરસથી બચવા માટેનો એક અસરકારક માર્ગ માનવામાં આવી રહ્યો છે. ઘરોમાં કેદ કપલ્સ મત લોકડાઉન સંબંધોને પણ પારખવાનું કામ કરી રહ્યું છે, ખાસ કરીને જ્યારે પતિ પત્ની બંને વર્કિંગ હોય. આવા સમયમાં પાર્ટનર એકબીજા પાસે ઓફિસની સાથે સાથે ઘરના કામમાં પણ બરાબર ભાગીદારીની આશા રાખતા હોય છે.
લોકડાઉનએ જિંદગીને ઘણી રીતે બદલી નાખી છે. જિંદગી પ્રત્યે લોકોનો અભિગમ અને પ્રાથમિકતાઓ બદલાઈ રહી છે. પરિવર્તનના આ સમયમાં કપલ્સની એકબીજા માટેની જવાબદારી પણ વધી રહી છે. કેટલીક ખાસ પદ્ધતિઓ અપનાવીને તમે પોતાના સંબંધોને વધુ મજબૂત બનાવી શકો છો જેનાથી મુશ્કેલી ભર્યો આ સમય પસાર કરવામાં તમને બંને માટે સરળ થશે.
પાર્ટનર સાથે સંબંધ મજબૂત કરવા હોય તો સૌથી પહેલા તમારે પોતાનું ધ્યાન રાખવું પડશે. પોતાને સ્ટ્રેસ ફ્રી રાખવું પડશે. થોડો સમય એકલા વિતાવો. પુસ્તકો વાંચો અથવા કંઈ લખો. માનસિક રીતે પોતાની જાતને મજબૂત કરવા માટે મેડિટેશન કરો.
પ્લાનિંગ કરો
કોઈ પણ પરિસ્થિતિનો કેવી રીતે સામનો કરવાનો છે તેનું પ્લાનિંગ તમારા પાર્ટનર સાથે બેસીને કરો. કોઈ પણ મુદ્દે ખુલીને તમારા પાર્ટનર સાથે ચર્ચા કરો. જવાબદારીઓને સમાન રીતે વહેંચી એકબીજાને ટેકો આપો. દિવસ સમાપ્ત થાય એ પહેલા બીજા દિવસે કયા કામને કેવી રીતે કરવાનું છે તેનું પણ પ્લાનિંગ પહેલાથી જ કરો.
લાગણીઓને સમજો
કામના ભારને લીધે એકબીજાને અવગણશો નહીં. જીવનસાથીને પૂછતા રહો કે તે કેવું અનુભવે છે, તેને કંઈ વસ્તુની જરૂર તો નથીને? અથવા તમે તેને કોઈ અન્ય રીતે કેવી રીતે મદદ કરી શકો છો.
એકબીજાને સ્પેસ આપો
આ સમયે, તમે બંને એકબીજા સાથે વધુને વધુ સમય પસાર કરશો. આ સમયે પ્રેમની સાથે તણાવ રહેવાનું શક્ય છે, તેથી એકબીજાને થોડી સ્પેસ આપો. જો તમે બંને ઓફિસનું કામ કરી રહ્યા છો, તો પછી અલગ અલગ રૂમમાં કામ કરો. ભલે તમે આખો દિવસ ઘરમાં હોવ, પરંતુ જીવનસાથીને થોડો સમય એકલા પસાર કરવાની તક આપો. તમે બંને એક જ રૂમમાં એકબીજા સાથે વાત કર્યા વિના પુસ્તકો વાંચવા અથવા વેબ સિરીઝ જોઈને પણ સમય વિતાવી શકો છો અને તમારા શોખને પૂરા કરવાની સાથે સાથે તમારા પાર્ટનરને સ્પેસ આપી શકો છો.
એકબીજાની પ્રસંશા કરો
કોઈપણ પાર્ટનર પરફેક્ટ નથી હોતો પરંતુ આવા કપરા સમયમાં દરેક જણ એકબીજાને સાથ આપવાનો પ્રયાસ કરી રહ્યું છે. તો તમારા પાર્ટનરના પ્રયત્નો માટે તેની પ્રસંશા કરો અને તેનો આભાર વ્યક્ત કરો.
સાથે બાગકામ કરો
પોતાને સકારાત્મક રાખવા માટે બાગકામ કરતા સારો વિકલ્પ બીજો કોઈ હોઈ શકે નહીં. એકબીજા સાથે બાગકામ કરો અને રોપાઓ રોપો. આનાથી માનસિક તાણ પણ ઓછું થશે. તમે આ પ્રકારની અન્ય કોઈ પ્રવૃત્તિ પણ કરી શકો છો.